قدم إمام عاشور نجم الأهلي اعتذارًا لناديه والجماهير بسبب الأزمة الأخيرة حيث تخلف اللاعب عن بعثة ناديه المسافرة إلي تنزانيا لخوض مباراة يانج أفريكانز التنزاني بدوري أبطال أفريقيا.
وقال إمام عاشور عبر موقع “إنستجرام”:” للأسف كلام كتير مغلوط وغير صحيح بيتردد بخصوص اللي حصل، وأنا متقبل أي قرار ياخده النادي، وواثق أنه المسئولين في الأهلي هيتفهموا موقفي كويس.. أنا فعلا عندي دور برد جامد ودرجة حرارتي عالية وتقلبات في المعدة بشكل غير طبيعي، وباخد مضادات حيوية. وللأسف كل أسرتي بتعاني من نفس الأعراض.. وأنا بلغت الدكتور أحمد جاب الله بظروفي الصحية وعدم قدرتي على السفر. وده إجراء غير كافٍ في مثل هذه الأمور”.
وتابع:” لكن أخطأت بحسن نية وكان المفروض أتواصل مع الكابتن وليد صلاح الدين علشان يبلغ المدير الفني وتتعمل الإجراءات الطبية المتبعة عند التخلف عن السفر.. الموضوع اتقفل خلاص. وتواصلت امبارح بالليل مع الكابتن وليد صلاح الدين. وأنا تحت أمر النادي”.
وأكمل:” جمهور الأهلي سندي وضهري بعد ربنا سبحانه وتعالى. وبعتذر للنادي والجهاز الفني وزمايلي وقبلهم جمهور الأهلي. أنا فخور باللعب في أكبر نادي في أفريقيا. وعلاقتي بجماهيره العظيمة لا تقبل القسمة على اتنين.. وأرجو من الجميع إغلاق هذا الموضوع .. والناس اللي بتقول ان إمام عايز يلوي دراع النادي بقولهم حسبي الله ونعم الوكيل.. محدش يقدر يلوي دراع الأهلي. ولا يمكن أفكر بالطريقة دي أبدا .. وانا اتشرفت بارتداء الفانلة الحمراء وبقالي 3 سنين في النادي. والحمد لله عمري ما قصرت لا في حق النادي ولا جماهيره. وده حقهم عليا. ووجودي في الأهلي نادي القرن وفي ضهري جمهور الأهلي يعوضني عن كل حاجة .. عندنا ماتش بكره مهم. يارب كل التوفيق لزمايلي والجهاز الفني ونحقق الفوز اللي يسعد كل الأهلاوية”.